e. a.
REDACCIÓN / LA VOZ
Hoxe será o último día en que se poderán poxar as capturas. As nasas teñen que estar xa todas en terra
Os últimos polbos desta campaña desembarcaranse hoxe nas lonxas galegas. Poderán poxarse mañá naquelas rulas nas que os sábados tamén hai poxas, pero ata aí. Non haberá máis cefalópodo galego fresco —polo menos polos leitos autorizados— ata o 3 de xullo, xa en plena tempada alta do turismo.
Aínda que os profesionais teñen ata as 16.00 horas para recoller o que entrou nas nasas, nalgúns portos, como o de Bueu, hai xa días que ven nasas acumuladas no peirao. Porque, iso si, hoxe teñen que quedar todas en terra. As que continúen caladas no mar estarano de forma irregular e, por tanto, serán requisadas.
Agora ben, a veda non é só para os naseiros. Está prohibido capturar, ter a bordo, transbordar, desembarcar, almacenar ou vender polbo obtido con calquera arte de pesca. Por suposto, tamén afecta os pescadores recreativos.
Cando o 3 de xullo finalice o período de descanso biolóxico e poida volver extraerse cefalópodo será xa unha nova campaña (2023-2024) e haberá novas normas. Para empezar, sobe a cota diaria que os profesionais poderán desembarcar da especie, aínda que de forma diferente ao que esperaban as confrarías. No primeiro tramo da tempada, que vai do 3 de xullo ao 1 de agosto, poderanse desembarcar 35 quilos por barco e día e outros tantos por tripulante enrolado e a bordo, fronte aos 30 da campaña que hoxe termina. Tamén se fixa un tope total por barco: 240 quilos. O resto da campaña a cota subirá a 55 quilos, cun tope global por xornada e buque de 350 quilos.
Cotas semanais
O plan establece por primeira vez a posibilidade de substituír as cotas máximas diarias de captura e desembarco por topes semanais, pero será sempre dependendo da evolución da campaña e «atendendo a circunstancias que ou xustifiquen debidamente». Esta será unha medida de carácter temporal que permanecerá vixente «unicamente mentres duren as causas que a motivaron», aclara a Consellería do Mar.
Non cambia, con todo, o horario co novo plan de xestión. Seguirá sendo de 5.00 a 16.00 horas. Tampouco cambia o número de nasas permitido, que se mantén en función do tamaño da embarcación e o número de tripulantes. Mantense así mesmo o réxime de calado das nasas, que terán que levantarse todos os días se se calan a menos de 20 metros na ría de Pontevedra e do 3 de xullo ao 1 de outubro en Arousa.
O plan non recolle, con todo, a marxe de tolerancia que os depósitos pedían para cubrir as diminucións que sofren os exemplares desde que se pescan ata que se comercializan. Desde Mar explican que se iniciou a tramitación para recoller esa marxe de tolerancia que permitirá vender polbos por baixo dun quilo, que seguirá sendo a talla mínima de desembarque. Precisaron que ese cambio debe facerse por outra vía normativa distinta.
Confraría Pescadores Cedeira 
Debe estar conectado para enviar un comentario.