S.S.
REDACCIÓN / LA VOZ
Ofrecerá a embarcacións que os necesiten o que outras non adoitan aproveitar
Nada menos que 32,6 millóns de quilos o ano pasado e 28 o anterior, só en augas nacionais. Para que non queda sen capturar todo ese peixe, que en primeira venda valería uns 197 millóns de euros, o Ministerio de Agricultura, Pesca e Alimentación retiroullo a barcos aos que adoitaba sobrarlle e repartiuno gratis entre outros que esgotaran cotas. Agora fará o mesmo con todas as cotas españolas en todos os caladoiros. Para calcular canto pode sobrar no último tramo do ano, frea durante un tempo as transferencias temporais, como lle chama a cómpra-venda ou intercambio de posibilidades de pesca.
Por primeira vez en augas internacionais, xa parou ata o 26 as de atún patudo do Atlántico. Tras anunciar que o día 10 detería as de sardiña en augas nacionais atlánticas, acaba de comunicarlle ao sector que entre ese día e o 1 de outubro tampouco permitirá as doutras sete especies, tamén en caladoiros españois: lirio, lagostino, galo, xurelo, pescada, rape e xarda.
Se cumpre os prazos apuntados, a redistribución faraa pública «antes do 15 de outubro». O obxectivo segue sendo o de «aproveitar ao máximo todas as posibilidades das cotas asignadas a España». Sobre todo porque detectou «un problema de falta de aproveitamento do recurso por parte dalgunhas frotas e un esgotamento temperán das posibilidades de pesca por parte de outras».
Sucede coas de patudo, que nunca se esgotaron nos últimos anos pero que non poden capturar barcos artesanais canarios nin doutras frotas desde hai semanas. E tamén coas de sardiña, que tanto necesitan os cerqueiros do noroeste, pero que ata o de agora apenas consumiron os sur e os xeiteiros das Rías Baixas.
A redistribución que estende agora a outras sete especies incúmbelle en Galicia e no resto do Cantábrico a pesqueiros de artes menores, arrastre de fondo de augas nacionais e portuguesas, palangre de fondo, rasco, volante e xeito. E no golfo de Cádiz, aos de artes menores, aos arrastreiros de fondo e aos cerqueiros de litoral.
Pesca denomina «mecanismo de optimización» ao que emprega para reatribuír cotas, aínda que con condicións. O ministerio que preside en funcións Luís Planas trata de sacarlle o máximo partido posible ás posibilidades nacionais de pesca porque as considera un ben público. E pretende evitar amarres de buques por falta de cotas cando lles «van a sobrar a outros».
Confraría Pescadores Cedeira 
Debe estar conectado para enviar un comentario.