A. F. C.
ORTIGUEIRA / LA VOZ
Dous buzos coas anémones collidas na zona de Vilanova Martina Miser
Mar aproba plans de explotación conxunta desta especie e de longueirón para os depósitos do Barqueiro e Espasante
A Anemonia viridis, que moita xente coñece como pixa de mar, é o ingrediente dunha tapa «case imprescindible» en moitos locais do sur de España. As ortiguillas crujientes que triunfan nos bares costeiros da provincia de Cádiz son, en realidade, anemones, clasificadas como marisco. A Consellería do Mar aprobou o plan de xestión conxunta para a conservación e explotación deste recurso, para as confrarías de Espasante (Ortigueira) e O Barqueiro (Mañón), na modalidade de mergullo (para 2023 e 2024), polo que pronto se poderán degustar as anemones extraídas da costa de Ortegal.
O ámbito do plan comprende desde a praia de Morouzos ata a punta do Castro de Vilela (na ría do Barqueiro), e as subzonas de explotación autorizadas son o Porto de Espasante e San Antonio (entre Ladrido e Picón); e As Atravesadas, Campo Torto, A Estaca, Bares e Castro de Vilela (en Estaca de Bares). Mar permite un máximo de dúas embarcacións (unha por depósito), con tres tripulantes cada unha. As confrarías están pendentes de que se abra o prazo para formalizar a solicitude.
Recursos «en auxe»
José Guillermo do Río, Pisco, biólogo do depósito do Barqueiro, explica que se trata «de poboacións bastantes delicadas, que hai que tratar con mimo na extracción para poder ter reservas ao ano seguinte». Sinala que é unha especie «en auxe», que xa se extrae noutras confrarías galegas e que resulta atractiva para a xente que se incorpora ao sector, como as algas ou os ourizos, que tamén se engloban no capítulo de «recursos específicos». O técnico destaca que a explotación de novas especies «permite alternar e dar descanso a outras, como o percebe, que se está machucando», e contribúe á viabilidade do sector. Cada profesional poderá capturar un máximo de 15 quilos ao día (cada individuo deberá pesar máis de 15 gramos). O período de extracción abarca xaneiro e febreiro, e do mes de xullo ao de decembro (ambos os incluídos).
Máis información ……
Confraría Pescadores Cedeira 
Debe estar conectado para enviar un comentario.