A conselleira de Igualdade sinala que xa existe no anteproxecto da norma que se aprobará antes de abril
A conselleira de Promoción de Emprego e Igualdade, María Jesús Lorenzana, asegurou a futura lei galega de igualdade entre homes e mulleres incluirá establecer un observatorio específico nese ámbito para o sector pesqueiro.
Segundo explicou nunha sesión plenaria do Parlamento de Galicia en resposta a unha interpelación da deputada do PSdeG Patricia Otero, ese observatorio xa figura no anteproxecto de lei que está á espera do informe do Consello Consultivo para a súa aprobación previsiblemente antes de abril polo Goberno galego.
A lexislación establecerá un estatuto propio para as mulleres do mar e do medio rural cun observatorio e dúas subcomisións específicas en cada ámbito, informou a conselleira, e explicou que será un «órgano de estudo e asesoramento para mellorar as condicións laborais en igualdade» en ambos os sectores.
O observatorio contará «con todos os medios necesarios, incluídos especialistas técnicos», tal e como expuxo a deputada socialista, quen apuntou que esta é unha reclamación das mulleres do sector pesqueiro para adoptar «medidas correctoras da súa situación».
Otero destacou que das 63 confrarías de pescadores de Galicia só tres teñen patroas maiores á fronte e que, en xeral, as mulleres están «infrarrepresentadas» en todos os órganos de decisión do sector.
Lorenzana coincidiu en que aínda hai «moito camiño por percorrer» para a igualdade de xénero nese sector, no que as mulleres representan un 24% de afiliación no Réxime Especial do Mar da Seguridade Social en Galicia e tres cuartas partes traballan por conta propia, mentres entres os homes é ao revés, só un terzo traballa pola súa conta.
Confraría Pescadores Cedeira 
Debe estar conectado para enviar un comentario.