A frota de baixura do Norte, cos pescadores vascos á cabeza, garante que haberá bonito no mes de setembro, tras esgotar a mediados de agosto só algo máis da metade da cota dispoñible para a actual campaña dunha das principais especies. Descargáronse xa uns 8,5 millóns de quilos de bonito, en portos do Norte. En total levan esgotados un 60 por cento da cota co que aínda queda unha marxe suficiente para seguir coa costeira, algo considerado positivo polos arrantzales, que poderán seguir capturando e que, de momento, están a vender a prezos máis competitivos debido a esta oferta máis graduada, aínda que co condicionante de ter que afrontar novas viaxes con altos prezos do gasóleo para culminar a tempada o mes próximo.
O feito de que a especie se atope este ano «en augas máis afastadas» e en menor cantidade que outras tempadas explica este alongamento da campaña. Nos últimos anos, a costeira desta especie tiña un peche prematuro que condicionaba a conta de explotación das empresas pesqueiras, pero este ano non vai ser así a teor das capturas que aínda están no ecuador.
O pasado ano, o 16 de agosto a Secretaria de Pesca comunicou que, como consecuencia da previsión de esgotamento da cota española, quedaba pechada a pesqueira. Por iso, o mantemento este ano da campaña ata setembro por vez primeira en cinco anos é considerado como unha vitoria polos arrantzales. A do 2020 finalizou o día 19 de agosto; a campaña do 2019, o 27 de agosto; e a do 2018, o 23. En 2017 pechouse o 13 de outubro e en 2016, o 5 dese mes, a época ata ese momento habitual. O peche da campaña tan prematuro dos últimos anos supoñía un imponderable para os arrantzales que debían centrar as faenas exclusivamente noutras especies como a sardiña e o xurelo, ao esgotarse as cotas permitidas.
O total admisible de capturas de bonito a nivel mundial é de 37.801 toneladas. A cota para o conxunto da frota estatal é duns 18.000, moi baixa para os preto 350 barcos que se dedican á especie. O prezo medio deste ano, ata xullo, roldaba o 4,25€/quilo, uns datos que foron valorados de maneira positiva e que anunciaron unha boa campaña.
Mala mar
O presidente da Federación de Confrarías de Gipuzkoa, Eugenio Elduaien, explica a este xornal que entre as causas do alongamento da costeira de bonito está o feito de que «o peixe está máis lonxe e tamén comprobamos que o recurso non abunda como outros anos». A iso súmaselle que na última semana contouse con malos tempos na mar que imposibilitaron partir aos caladoiros de pesca. Os arrantzales xulgan que dispoñen de cota ata finais de setembro co que deberán sumar un maior custo de gasoil #ante o alongamento das faenas. Ademais, o prezo medio da especie este ano está a ser máis alto sobre os 4,10 euros quilo na lonxa fronte aos 3, 75 euros do pasado ano. «Co maior custo que imos ter que asumir co gasoil e o feito que estea máis lonxe e a costeira dure máis, veremos como terminamos a tempada que posiblemente se alongará ata finais de setembro. Poder vender a bos prezos dependerá tamén do tamaño da pesca ao final da campaña», engade Elduaien.
Desde Kofradia, Organización de produtores de pesca de baixura de Gipuzkoa, engaden que a campaña deste ano «achégase máis á normalidade da pesqueira do bonito que as dúas últimas campañas (que se pecharon a mediados de agosto) que foron realmente intensas e excesivamente curtas». «Aínda que a repartición da cota do bonito axudaría moito ao sector nunha mellor xestión da campaña, a entrada máis pausada do bonito está a permitir obter uns prezos medios superiores que nas últimas campañas», sinalan estas fontes. Tamén resaltan que a cota para este 2022 é «histórica», xa que «nunca houbo unha cota tan elevada, que ademais conta co selo MSC de sustentabilidade, o que demostra que a saúde do stock do bonito do norte é boa».
Confraría Pescadores Cedeira 
Debe estar conectado para enviar un comentario.